Nagdugang ang Nationalist People’s Coalition (NPC) sa kaalyado sang Partido Federal Pilipinas ni President Ferdinand Marcos Jr. binulan antes ang 2025 midterm elections.
Ini nga duha ka partido ang nagpirma na sang alliance agreement kagab-i, Mayo 18.
Natabo ini masobra isa ka semana matapos nga nagpirmahanay man sang alyansa ang partido ni Marcos kag ang Lakas-Christian Muslim Democrats (Lakas-CMD) nga amo naman ang pinakadaku nga faction sa Kamara kag ginapamunuan sang pakaisa sang presidente nga si House Speaker Martin Romualdez.
Ang NPC ang ginapamunuan ni former Senate President Tito Sotto kag yara sang 4,000 ka mga myembro kun sa diin 1,910 ang active public officials.
Sa sini man nga partido nakapaidalom ang lima ka seats sa Senado kag 38 sa Kamara.
Suno kay Marcos, ini nga alyansa ang wala lamang ginhimo para sa midterm elections kundi isa ka paagi agud mapadayon ang kolaborasyon para sa kinahanglanon sang pumuluyo kag pag-uswag sang nasyon.
“I think it’s very natural for people to think that this is being done for the midterm elections. Of course, that’s part of it, but really it is to formalize what already existed,” suno sa chief executive sa chance interview sa reporters.
“We are trying to put together once again the team that will work together, and this really is derived from our original concept that progress will only come from unity.”
Nagpabutyag man si Marcos sang interes nga magpirma man sang alyansa kaupod sa Nacionalista Party kag sa National Unity Party.
Matandaan nga ang PFP, Lakas-CMD, Hugpong ng Pagbabago, Partido ng Masang Pilipino kag iban pa nga guest candidates halin sa nagkalain-lain nga partido amo ang nagbug-os sang UniTeam Alliance sang 2022 national elections nga amo rason sang landslide win nanday President Marcos kag Vice President Sara Duterte.#
