ILOILO CITY – Nagpadulong sa Kyiv si German Foreign Minister Annalena Baerbock para sa isa ka surprise visit nga suno sa iya, isa sa mga pamaagi agud mapakita ang suporta sang Germany sa Ukraine batuk sa Russia.
Ini na ang ikaduha niya nga pagpadulong sa Kyiv kag ini ang kasunod sang pagpadulong man ni Ukrainian Prime Minister Denys Shmygal sa Berlin kun sa diin, nagpanawagan ini sang dugang nga mga war equipment.
Sang nagligad nga mga semana, nagpadala ang Germany sang howitzers, rocket launchers kag anti-aircraft missiles sa Kyiv.
Ang mas mabaskog pagid nga war materials kaangay sang anti-aircraft systems, rocket launchers mounted on pick-ups kag anti-drone equipment ang igahatag bilang dugang nga military aid package nga masobra sa 500 million euros.
Si Baerbock ang pinakauna nga nagbisita nga senior German government figure sa Kyiv.
