ILOILO CITY – Gin-acquit sang Sandiganbayan si former Batangas Representative Oscar Gozos kag pulo pa ka Department of Agriculture (DA) Region 4A officials bangud sang graft connection sa P728 million fertilizer fund scam sang 2004.
Sa 24 ka pahina nga desisyon, suno sa antigraft court, napaslawan nga pamatud-an sang government prosecutors nga naggamit sang ila posisyon si Gozos kag ang mga DA officials sang nagbakal sang P3 million nga balor sang apat ka unit sang shredder chipper 15 HP sang April 12, 2004 nagikan sa LCV Design and Fabrication Corporation nga ginapamunuan ni Remus Villanueva.
Ang ini nga purchase ang ginbakal pinaagi sa isa direct contracting kun sa diin ini ang gin-charge sa Farm Input Fund sa idalom sang P728 million Ginintuang Masaganang Ani Program sang DA.
Suno pa sa antigraft court, ang Intellectual Property Office ang nag-grant sa LCV Design sang Utility Model Registration nga valid humalin sang tyempo sang application sang February 20, 2004 nga nagahatag sang right sa LCV Design nga indi pagpahanugutan ang indi otorisado nga indibidwal nga maggamit, mag-offer sang sale, magbaligya ukon mag-import sang Tornado machine nga wala sang authority.
Ini nga registration suno sa Sandiganbayan ang isa ka pamatuod nga ang Tornado machine ang protektado sang intellectual property.
Sa conclusion sang Sandiganbayan, napaslawan ang prosecution nga pamatud-an nga required ang public bidding sa procurement.
Bangud sini, ang mga akusado nga sanday Oscar Gozos, Dennis Araullo, Juvylee Obice, Raymundo Braganza, Grover Dino, Lourdes Imperial, Abelardo delos Reyes Bragas, Felix Ramos, Ofelia Montilla kag Remus Villanueva ang acquitted sang paglapas sang Section 3 sang Republic Act 3019 (Anti Graft and Corrupt Practices Act).
