Nagapati si Former Buenavista Mayor Eugene Reyes nga obligasyon sang Guimaras Electric Cooperative (GUIMELCO) nga ipaathag sa mga konsumidor kag pumuluyo kon ngaa mataas ang kuryente sa isla sang Guimaras.
Sa interview sang Bombo Radyo kay Reyes, iya ginpahayag nga natukiban sa konseho nga may mga tax nga ginapatong ang mga power supplier sang GUIMELCO rason nga mataas ang sukkot nila sa kuryente.
Suno kay Reyes, nagalab-ot sa P37 per kilowatt ang sukot sang GUIMELCO sa mga konsumidor, kon sa diin, ginakabig man ini nga pinakamahal sa bug-os nga Western Visayas.
Ginkwestyon man sang natungdan ang mga opisyal sang Guimaras kon ngaa ginpabay-an ang mga issue nga ginapangatubang sang nasambit nga Electric Cooperative.
Tuyo man ni Reyes nga ipakigbato ang ila ginaduso kon sa diin, mahimo sila sang isa ka manifesto agud maimbestigaran ang problema sa kuryente kag matumod kon ngaa padayon nga ginatago sang GUIMELCO ang agreement sa tunga sang ila mga power suppliers.
Una na nga nagsulat si Buenavista, Guimaras Sangguniang Bayan Member Atty. Vincent De Asis sa GUIMELCO agud magpangayo sang ila power supply agreement, apang wala sila naghatag kag nagsabat nga ang tikang ang isa ka confidential.
