ILOILO CITY – Ginpakigbahin sang isa ka cabin crew ang kabudlay nga iya naagyan sa training tubtub sa iya trabaho.
Sa interview sang Bombo Radyo kay Ma. Jessa De Asis, 22, tumandok sang Nabas,Aklan kag nag-graduate sa kurso nga Bachelor of Arts in Broadcasting sa West Visayas State University, iya ginpahayag nga childhood dream niya nga mangin isa ka flight attendant.
Sa ila pag-apply, una nga ginlantaw amo ang ila nawong, ngipon kag height sa diin nagakadapat nga indi magnubo sa 5’3 ang babaye kag 5’7 naman sa lalaki.
Suno kay De Asis, halos adlaw-adlaw sila nga naga exam sa diin word by word dapat ang sabat kag naga lecture man.
Magluwas sini may actual man sila nga training sa sulod sang eroplano.
Sang nagtrabaho na bilang cabin crew, madamo sila sang ‘perks’ sa diin libre ang ila ticket kag makapadulong sa luwas sang pungsod nga free hotel accommodation kag allowance.
Mangin ang ila pamilya ang may 10 man ka free tickets man back and forth.
Apang pag-abot sang COVID-19 pandemic, tuman ang kasubo nga nabatyagan ni De Asis bangud isa siya sa na lay-off ukon nadulaan sang trabaho.
Kun matapos na ang pandemya kag kun may hiring liwat, gin-ako sang natungdan nga luyag niya sa gihapon nga mag apply bilang cabin crew.
