Gin-sentensyahan sang lima ka tuig nga pagka-preso ang former democratic leader sang Myanmar nga si Aung San Suu Kyi matapos ginpahayag sang korte nga guilty ini sa 11 ka corruption cases nga ginpasaka batok sa iya.
Suno sa junta court, ginkawat ni Suu Kyi ang $600,000 ukon P31.2 million nga cash kag gold bars halin sa former head sang Yangon, ang pinakadaku nga syudad kag rehiyon sa Myanmar.
Bangud sa latest conviction, nagdangat na sa 11 ka tuig nga pagka-preso sa amo nga democratic icon bangud nangin guilty man ini sa iban anay nga offenses.
Kun mapamatbatan ini nga guilty pa gid sa nabilin nga counts sang mga kaso nga ginpang-file batok sa iya — lakip na ang siyam ka dugang nga corruption charges, mangatubang siya sang masobra 160 ka tuig nga sentensya sang pagkabilanggo.
Naka-house arrest si Suu Kyi halin sang Pebrero 2021 sang gin-take over sang military coup ukon kudeta ang gobyerno sa pungsod.
Ang 76-anyos nga democratic leader nga isa man ka Nobel laureate ang ginpasakaan sang lain-lain nga kaso-kriminal lakip na ang voter fraud.
Ginpanginwala ni Suu Kyi ang tanan nga alegasyon kag ginpakamalaot man sang rights group ang court trials bangud sikreto ini nga ginpatigayon — wala sang tion nga ginpahanugutan si Suu Kyi nga mag-atubang sa media.
Indi pa subong maathag kun sayluhon na si Suu Kyi sa presuhan matapos ang guilty verdict sa korte. ##
