Nagbalik sang masobra P100 million nga kwarta si former Department of Public Works and Highways (DPWH) District Engineer Henry Alcantara sa Department of Justice (DOJ) kahapon.
Suno kay Acting Justice Secretary Fredderick Vida, nagalab-ot sa P110 million ang kabug-usan nga kantidad sang kwarta nga gin-turn over ni Alcantara sa ahensya.
Ginbuyagyag pa ni Vida nga binulto nga kwarta ang gindala ni Alcantara, nga gin-ako sini nga naghalin sa iya mga ginkawat gikan sa mga maanomaliya nga flood control projects sang gobyerno.
Kabahin ini sang ginapahayag nga ginpromisa ni Alcantara nga “restitution” nga nagalab-ot sa kabug-usan nga P300 milyon, suno sa tiglikom.
Pahayag pa ni Vida, ang tikang ni Alcantara kag ang iya pag-ako nga naulamid siya sa flood control scandal amo ang isa sa mga kondisyon para mapilian siya bilang state witness.
Apang ginpunto man niya nga indi ini nagakahulugan nga automatic nga mangin testigo sang estado si Alcantara bangud lamang nga nagbalik siya sang ginkawat nga kwarta.
Kasunod sini, ginpakigbahin ni Vida nga isipon pa sang banko ang kwarta agud masiguro ang eksakto nga kabug-usan sini.
Nagalaom ang kampo ni Alcantara nga makabulig ang pagbalik sini sang kwarta agud mapilian bilang state witness sang kaso.
