Nagbyahe padulong sa Estados Unidos sang Amerika si anay Department of Public Works and Highways (DPWH) Secretary Manuel Bonoan nga isa sa ginatudlo nga involved sa flood control scandal.
Ginkumpirma ini ni Bureau of Immigration (BI) Spokesperson Dana Sandoval.
Pahayag sini, nagbiya padulong sa luwas sang pungsod si Bonoan kahapon sang hapon.
“We confirm that former Secretary Manny Bonoan departed this afternoon for the United States via Taiwan,” suno kay Sandoval.
Suno sa iya, gin-check sang immigration officers kun may hold departure order ukon warrant of arrest batok kay Bonoan, kag sang ginklaro nga wala, ginpasugtan ini nga makalakat.
Nahibaluan nga lakip si Bonoan sa Immigration Lookout Bulletin Order (ILBO) nga ginpaguwa sang Department of Justice (DOJ).
Kun yara ang pangalan sang isa ka tawo sa ILBO, buot silingon, gina-monitor sang awtoridad ang mga byahe sini. Lain ini sa hold departure order nga amo ang makapugong sa isa ka tawo nga magbiya sa Pilipinas.
Na-implicate si Bonoan sa corruption sa government infrastructure works lakip na sa flood control projects.
Base sa Independent Commission for Infrastructure (ICI), liable ang anay tiglikom sa “ghost” flood control project sa Bulacan nga balor P95.04 million.
Matandaan nga nagrekomendar ang ICI sang kaso-administratibo batok sa anay tiglikom bangud sa P72.4-million “ghost” riverbank project sa amo man nga probinsya.
Matandaan nga nag-resign si Bonoan sa DPWH sa tunga sang sampaw-sampaw nga isyu sang kurapsyon, kag ang nagbulos sa iya amo si current Secretary Vince Dizon.
