Nagpasaka sang cyber libel complaint si anay Mayor Mamerto Pelopero III sang Dueñas, Iloilo batok kay Vice Mayor Aimee Paz Lamasan.
Ini may kaangtanan sa facebook post ni Lamasan nga natuhoy sa disallowance sa banwa kun sa diin gindalahig sang bise-alkalde ang pangalan sang anay alkalde.
Sa interview sang Bombo Radyo kay Pelopero, iya ginpahayag nga wala niya nauyunan nga ginasuspetsahan pa siya ni Lamasan nga siya ang nagapalapta sang mga isyu sa banwa apisar nga private citizen na ini.
Suno kay Pelopero, sa pagkamatuod 6 ka mga complaints ang ginpasaka sini batok kay Lamasan kag sa iban pa nga mga indibidwal.
Ini bangud nga may nagaguluwa nga mga troll accounts nga nagapakuno-kuno nga si anay Mayor Pelopero, apang sa bulig sang National Bureau of Investigation (NBI) Cybercrime Division natukiban nga ang mga nagakapot sini amo ang mga empleyado man sang Local Government Unit (LGU) sang Duenas.
Nagpasalig man ang iya abogado nga si Atty. Kaiser Cordero, nga kun mahitso na ang tanan, isapubliko nila kun sin- o ang mga responsable diri.
