ILOILO CITY-Nagpagwa sang official statement si former Iloilo City First Lady Maria Victoria ‘Marivic’ Mabilog kasunod sang pagpauli na sa Pilipinas sang iya bana nga si ex- Iloilo City Mayor Jed Patrick Mabilog.
Sa iya official Facebook page, ginpahayag sang anay First Lady nga ginakabig niya nga daw kaangay sang rollercoaster ang ila naagyan.
Ginbalikan man sini ang natabo sang 2017 sa diin nagbiya sila sa Pilipinas matapos nakabaton sang pamahog sa kabuhi ang anay alkalde halin kay former President Rodrigo Duterte sa diin ginbansagan pa ini nga protector sang iligal nga droga.
Ginpaathag man sini nga emosyonal ang iya mga anak nga sanday Nathan kag Patricia matapos nakita sang mga ini ang ila amay nga naghibi samtang ginapatpat ang naagyan nga kasakit ilabi na sang napatay ang iloy sang anay alkalde nga si Melchorita, sa diin wala sila nakapauli tubtob nga nalubong na lang ini.
Ginpasalamatan man ni Marivic ang tanan nga nagbulig agud safe nga makagwa ang mga ini sa Pilipinas sang amo nga tion.
Mangin ang mga Sisters of Dominican Order suno sa natungdan ang nagbulig man sa pagpangamuyo para sa ila tubtob nangin safe ang ila flight pagwa sa Pilipinas.
“It has been a rollercoaster ride the last few days. I tried to stay upbeat and even managed to post some funny memes to comfort myself and our many friends who felt our pain.But it has been difficult, heartbreaking at times. To be honest, I am still conflicted. The trauma of 2017, where I was literally on the run with an 8-year old boy just to stay alive, survive that darkest night, is gushing down and I get that drowning feeling.”
Matandaan nga kahapon sang nag-abot sa Pilipinas si Mabilog matapos ang halos pito ka tuig nga pagtinir sa luwas sang pungsod.
Sa iya pag-abot sa Ninoy Aquino International Airport (NAIA) Terminal 3, ginabanta 11:00 AM, sakay sang Cathay Pacific flight halin sa New York, United States, ginsugata si Mabilog sang mga operatiba sang National Bureau of Investigation (NBI).
Ginkumpirma ni NBI Director Jaime Santiago nga boluntaryo nga nagsungka si Mabilog sa mga tinawo sang NBI-NCR.
Suno kay Santiago, gin-isyu kay Mabilog ang warrant of arrest bangud sa mga paglapas sa RA 3019 (Anti-Graft and Corrupt Practices Act) kag Code of Conduct and Ethical Standards.
Yara si Mabilog sa kustodiya sang NBI kag gindala sa Sandiganbayan kag nagpiyansa sa balor nga P90,000 para sa iya nga temporaryo nga kahilwayan.
Si Mabilog ang ginapahayag nga nalakip sa mga gin-imbitar nga resource persons nga magatambong sa pagpadayon sang Quad Committee House Probe sa Huwebes.
