𝗚𝗨𝗜𝗠𝗔𝗥𝗔𝗦 —Ginaplano ni Former Guimaras Vice Governor Atty. Vicente De Asis nga mag-file sang complaint sa Energy Regulating Commission (ERC) bangud sa mahal nga kilowatts per hour (KWH) sang Guimaras Electric Cooperative (GUIMELCO).
Sa interview sang Bombo Radyo kay Atty. De Asis, iya ginpahayag nga halos tanan nga konsumidor sang electric cooperative sa probinsya ang nagapanghakroy bangud sa tuman ka mahal nga rate sang kuryente.
Suno kay De Asis, sugod sang-una pa sang ginareklamo ang mataas nga pagpanukot sang kuryente sang amo nga kooperatiba.
Ginpahayag man sini nga ang rason sang GUIMELCO kon ngaa nagpasaka sila sang rate amo bangud sa mataas man nga rental line distribution sa Iloilo.
Ini kasunod man nga ang kuryente nga gina-supply sa Guimaras paagi sa submarine cable ang nagahalin sa National Grid Corporation of the Philippines (NGCP) nga nakahamtang sa Iloilo.
Gintumod man sang natungdan nga ini ang nangin rason man nga sugod sang Hunyo, Hulyo, kag subong nga Agosto, nagtaas ang billing sa kuryente.
Gin-athag man sini nga ginalauman nga mas magalawig pa sa palaabuton nga mga binulan ang amo nga sitwasyon sang rate sang kuryente sa probinsya.
Nagapati man ang anay bise-gobernador nga kon i-apply ang Electric Power Industry Reform Act of 2001 ukon EPIRA law sa 27 ka mga turbines sang Wind Mill sa Guimaras posible nga mapahagan-hagan ang bili sang kuryente.
