Kabahin sa ginapilian sang team ni Iloilo City Mayor Jerry Treñas nga magatal-os kay Iloilo City Public Safety and Transportation Management Office (PSTMO) Head Mr. Jeck Conlu sa pagka-konsehal amo si Former Iloilo City Mayor Joe Espinosa III.
Ini kasunod man sang pag-atras ni Conlu nga magkandidato bilang konsehal sang syudad sa 2025 midterm elections.
Sa interview sang Bombo Radyo kay Iloilo City Councilor Miguel Treñas, iya ginpahayag nga sa subong ginakonsiderar sang ila grupo nga option si Espinosa, apang indi pa sini mahambal ang pinal nga plano kag desisyon.
Suno kay Treñas, nagpasalig man ang anay alkalde nga kon indi magpadalagan sa maabot nga eleksyon, pagasuportahan sini ang linyada sang ila nga grupo.
Ginpahayag man sini nga bisan magpadalagan man si Espinosa, magapakigbahin ini sa gihapon sa idalum sang team ni Mayor Treñas.
Gin-athag man sang natungdan nga malipayon ang anay alkalde nga magpangabuhi bilang private citizen apang nakadependi ini sa gihapon sa iya kon magapadalagan ini sa eleksyon.
Ginakabig naman ni Councilor Treñas nga dako nga bulig ang suporta nga ginapakita ni Espinosa ilabi na nga may mga grupo man ini nga iya.
Gintumod naman ni Executive Assistant to the Mayor Ms. Raisa Treñas-Chu nga personal ang rason ni Conlu kon ngaa nagdesisyon ini nga mag-atras sa eleksyon.
Suno kay Raisa Treñas-Chu, ginarespeto man sang grupo ang nangin desisyon ni Conlu bangud posible nga may mga personal man ini nga ginaagyan.
Gin-athag man sini nga sa subong, gina-finalize na sang ila team ang ila nga slate bangud may mga nagapakita man sang interes agud nga magpadalagan sa ginbakante ni Conlu.
