Ginpanginwala ni Former Buenavista Mayor Eugene Reyes nga siya ang rason kon ngaa delay ang social pension sang mga senior citizens sa Buenavista, Guimaras.
Ini kasunod man sang pagtumod sa ila ni Mayor Samuel Gumarin nga rason sang delay.
Sa interview sang Bombo Radyo kay Former Mayor Reyes, iya ginpahayag nga mga punong barangay, opsiyalesm kag Department of Social Welfare and Development (DSWD) Region 6 mismo ang naghambal nga na-delay ang pension bangud wala gilayon ma-comply ang requirements sang mga senior citizens.
Ginpahayag man sini nga may mga proweba nga magapamatuod nga madamo sang tyempo ang na-uyang bangud wala na-comply sang liderato ni Gumarin ang mga rekisitos nga kinahanglanon.
Suno kay Reyes, sang siya ang nagapungko nga alcalde sa amo nga banwa, wala lang sila nagasalig sa DSWD kag pondo mismo sang banwa ang ginagamit para sa pension sang mga katigulangan sa amo nga lugar.
Nagapati naman si Sangguniang Bayan Member Vincent Pascal De Asis nga ginabasol sa ila ang delay sang pension kasunod sang ila absent sang ginpatigayon ang special session nahanungod sa amo nga tikang.
Suno kay De Asis, natabo ang amo nga hitabo sang Pebrero subong nga tuig kon sa diin, Pebrero 10 sang nagpadala sang sulat si Acting Mayor Cyril Beltran sa mga Sangguniang Bayan members nga maga-hold sila sang session agud makahimo sang resolusyon para sa exemption sang Commission on Elections (COMELEC).
Dugang sini nga Pebrero 11 ang deadline sang petition for exemption, apang nagpatawag sang special session sang Pebrero 10.
Gintuad man sini nga wala sila personal nakabaton sang sulat rason nga wala sila nakatambong sa amo nga pagsinapol kag wala sila ginhatagan bangud wala sila sang komitiba nga ginakaptan.
Apang bangud apat lang man sila ang absent nga SB Members kag anom ang mga Sangguniang Bayan members ang present, napasar sa gihapon ang amo nga resolusyon.
