Ginkadismaya ni Former Buenavista, Guimaras Mayor Eugene Reyes ang paggamit ni Mayor Samuel Gumarin kag sang iya nga kaalyado sang ayuda sa pagpamulutika.
Sa interview sang Bombo Radyo kay Eugene Reyes, iya ginpahayag nga sa idalom sang mandatu sang Commission on Elections (COMELEC) ginadumilian ang mga kandidato nga magpaguwa sang ayuda ilabi na nga eleksyon.
Suno kay Reyes, tatlo ka semana na ang nagligad, ginkakibot niya nga ang mga residente ang dali-dali nga nagapa-photocopy sang ila mga ID’s bangud sa may i-claim nga ayuda kag pahambalon sang pangalan ni “Mayor Samuel Gumarin”.
Gin-athag man sini nga kasunod sang amo nga tikang sang mga nasambit nga opisyal, ginasundan ini sang pagpanghatag sang ayuda sang Department of Social Welfare and Development (DSWD).
Ginklaro man ni Reyes nga luyag lang niya nga makit-an sang COMELEC Region 6 ang nagakatabo sa ila banwa bangud parte na ini sa vote buying.
Dugang niya nga wala ini nagapamalabag sa mga ayuda para sa senior citizen kag pumuluyo, bangud tuyo lamang niya nga indi maimpluwensyahan sang pagpamulitika ang paghatag sang ayuda.
Ginhangkat man sini nga magdebate si Gumarin agud mahibaluan sang publiko kon sin-o ang nagasugid sang matuod.
Nagapati naman si Sangguniang Bayan Member Vincent Pascal De Asis nga ang ginhimo sang kampo ni Gumarin ang abuse of state resources nga nakasaad man sa COMELEC.
Suno kay De Asis, sa pagselebrar sang Worship Festival sang amo nga banwa, ang administrasyon ang nagbutang sang P350,000 nga amount para sa amo nga aktibidad.
Dugang sini nga may dokumento nga pirmado sang Tourism Officer sang ila banwa nga nagapamatuod nga ang kwarta nga gingamit sa tarpaulin sang festival, ang gin-gamit man sa ila campaign tarpaulins.
Bangud diri, nagalaum ini nga mahatagan sang dako nga igtalupangod sang COMELEC ang amo nga issue.
Ginpahayag man sini nga nagadihon na sila sang legal nga kaso agud mapasaka batok sa mga opisyal agud madagdagan sang show cause order.
