Gindesignar si former Iloilo City Mayor Jed Patrick Mabilog bilang special adviser ni House Speaker Martin Romualdez.
Gin-anunsyo ini antes ang speech sang anay alkalde sa final campaign sang Team Sulong Gugma sa Mandurriao subong nga gab-i.
“A very good news just came in. He is now the newly-designated special adviser for the House of Representatives of the Philippines — World Mayor Jed Patrick Mabilog,” kabahin sang introduction sang host sa former mayor.
Sa kopya sang Memorandum halin kay Secretary-General Reginald Velasco nga ginsapubliko subong man nga gab-i, nakasaad nga epektibo ang bag-o nga designasyon ni Mabilog halin sang Mayo 1.
Ginplastar sa memorandum nga importante ang kontribusyon kag mga panan-awan ni Mabilog sa iya field of expertise para nga mas mapaayo pa ang legislative agenda sang Kamara.
Matandaan nga nagbalik si Mabilog sa Pilipinas sang 2024 matapos ang pito ka tuig nga self-imposed exile sa luwas sang pungsod matapos gintawag anay ni former president Rodrigo Duterte nga “big-time narco politician” sang 2017.
Lakip man siya sa naghatag sang testimoniya sa quad-committee sa Kamara nga naga-imbestigar sa drug war sang former president.
Sang Enero 2025, matandaan nga naghatag man si President Ferdinand Marcos Jr. sang executive clemency kay Mabilog kaangot sa iya administrative case sang 2017. Sa amo nga desisyon, gin-angot sang Malacañang ang mga accomplishment sini bilang anay local chief executive sang Iloilo City.
