Nagapati si former Iloilo City Mayor Jed Patrick Mabilog nga tuman pa ka layo agud istoryahan ang pulitika.
Ini kasunod man sang paghatag sa iya sang executive clemency ni Pres. Ferdinand “Bongbong” Marcos.
Sa interview sang Bombo Radyo kay former Mayor Mabilog, iya ginpahayag nga ginaplano niya nga magapadulong sa Manila agud personal nga makapasalamat sa mga naghatag sa iya sang clemency.
Suno kay Mabilog, magatutok man siya sa pagkampanya sa Team Sulong Gugma ni Iloilo City Lone District Representative Julienne “Jam-jam” Baronda.
Ginhatagan man sini sang importansya ang pagpalapnag sang kapasidad ni former City Councilor Love-love Baronda nga magapapili bilang bise-alkalde sang Iloilo City.
Tuyo man sang natungdan nga magbalik bilang pribado nga citizen sang syudad sa masunod nga tatlo ka tuig.
Nagapati man si Mabilog nga madamo pa sang posible matabo ilabi na nga tuman pa ka layo ang 2028.
