Nagpahayag si former Mayor Jerry Treñas nga ang matuod-tuod nga isyu subong indi ang mga proyekto nga iya sang una, kundi ang mga ginapatuman ni Cong. Jamjam Baronda nga ginakabig sang mga residente nga palpak kag ‘delayed’.
Sa interview sang Bombo Radyo kay former Iloilo City Mayor Jerry Treñas, suno sa iya, nagsugod ang kontrobersya bangud sang tatlo ka bagyo nga nagdala sang mabaskug nga ulan, nga nagtuga sang pagbaha sa mga lugar nga wala man ginabaha sang una.
Ginatudlo sang mga residente nga ang mga flood control projects sa Jaro nga ginpatuman ni Cong. Baronda amo ang rason sang pagbaha. Sang pagkadto ni President Ferdinand “Bongbong” Marcos Jr. sa syudad, ginpahayag man nga palpak kag delayed ang mga proyekto.
Ginsiling ni Treñas nga ang iya mga proyekto sa public markets padayon nga ginahimo, kag bisan may pagka-delayed, makita nga may aktuwal nga trabaho.
Ginpabutyag niya nga indi ini “magic” kag indi pareho sa iban nga proyekto nga daw gina-magic lang ang resulta.
Sa bahin sang demand ni Cong. Baronda nga irelease ang records sang mga proyekto ni Treñas, ginpahayag sang former mayor nga ang mga dokumento yara sa Iloilo City District Engineering Office (ICDEO) kag kabalo man siya sang sulod sini. Suno sa iya, indi na relevant ang pahayag ni Baronda bangud ang isyu subong amo ang mga proyekto ni Baronda mismo. Dugang pa niya, nga ang presidente na mismo sang Pilipinas ang naghambal sang problema, gani dapat ipakita ni Cong. Baronda nga indi palpak ang iya ginaubra.
Ginsabat man ni Treñas ang akusasyon ni Baronda nga wala sang flood control planning sang iya administrasyon, kag uno sa iya, isa sa mga major nga proyekto nga iya ginpatuman amo ang “Iloilo flood way” nga nakabulig sa pagsolbar sang baha sa Jaro, La Paz, kag Mandurriao.
(Via Bombohanay Bigtime anchored by Bombo Donnie Degala)
