Ginpangabay ni former Iloilo City Mayor Jed Patrick Mabilog si Mayor Jerry Treñas nga untaton na ang pagpamulitika sa Iloilo City Government.
Ini kasunod man sang pagtamyaw ni Treñas kay Mabilog kasunod sang paghatag sa iya sang clemency ni President Ferdinand “Bongbong” Marcos Jr.
Sa interview sang Bombo Radyo kay Mabilog, iya ginpahayag nga dako ang iya pagpasalamat kay Mayor Treñas sa pag-upod sa iya sang siya ang nagaumpisa pa lamang bilang politiko.
Suno kay Mabilog, may nakit-an lang siya nga mga deperensya nga dapat lang niya ihambal bangud nakaagi man siya alkalde sang syudad.
Ginapauntat man sang anay alkalde ang pagpapromisa sa mga job hire nga maboto sang mga naluyagan ni Treñas nga kandidato.
Nagpanindugan man ang natungdan nga ang iya pagpanawagan ang indi lang tungod sa iya kag sa alkalde ukon sa ambisyon sini.
Gin-athag man ni Mabilog nga ini ang tanan tungod sa mga pumuluyo sang syudad nga yara sa middle class kag pigado.
Ginpahayag man sini nga wala siya nagahimo-himo sang istorya agud nga pakalainon si Treñas bangud ini ang iya nakit-an kag nangin singgit man sang kadam-an.
