ILOILO CITY- Ginakabig ni Iloilo City Lone District Rep. Julienne Baronda si former Mayor Jed Patrick Mabilog nga pinaka-credible nga resource person sa drug war sang anay Duterte administration.
Sa interview sang Bombo Radyo kay Rep. Baronda, iya ginpahayag nga siya mismo ang makapamatuod nga lunsay kamatuoran ang ginpangbuyagyag ni Mabilog sa iya pag-atubang sa quadcom hearing sang nagligad nga semana.
Gindepensahan naman ni Baronda si Mabilog batok sa akusasyon ni Senator Bato dela Rosa nga ginagamit lang sang administrasyon ni Presidente Marcos ang anay alkalde bilang kabahin sang demolition job batok sa mga kaalyado ni former President Duterte.
Matandaan nga sa pag-atubang ni Mabilog sa quadcom, ginbuyagyag sini nga nakabaton siya sang impormasyon nga piliton siya nga itudlo sanday former Senators Franklin Drilon kag Mar Roxas bilang drug lords.
Gintuad man sang anay alkalde nga nakabaton siya sa pagpamahog sa kabuhi matapos siya ginbansagan ni Duterte bilang protector sang narcotics trade sa Iloilo.
Samtang,gindugang naman ni Baronda nga wala pa sang kasiguruhan kun magaaatubang pa liwat si Mabilog sa quadcom hearing.
