Wala nakamuno si anay Iloilo City Mayor Jed Patrick Mabilog sa iya nga hinablos kun may plano ini nga magpauli sa syudad ilabi na subong nga ginabukad ang isyu sa kontrobersyal nga drug war ni anay Presidente Rodrigo Duterte.
Sa interview sang Bombo Radyo kay Ms. Sheen Marie Mabilog, iya ginpahayag nga bilang hinablos, gina-abi-abi gid sang ila pamilya kun may yara sang oportunidad nga mahatag agud malimpyuhan sang anay alkalde ang iya pangalan matapos gin-tag anay ni Duterte nga “drug protector.”
Magluwas diri suno sa hinablos, nahidlaw man sila sa iya tiyo.
2017 pa ini nagbiya sa syudad para sa opisyal nga byahe kag medical treatment kag nagpabilin na lang sa luwas sang pungsod ilabi na bangud sang 2018, nagpaandam pa si Duterte nga patyon ini kun magbalik sa Pilipinas.
Pahayag naman ni Ms. Sheen, kun naga-istoryahanay man sila sang former mayor sa mga isyu diri sa Iloilo, wala sila nagapadalom sa pulitika bangud ginatahod niya ang stress-free na sini nga pangabuhi sa abroad.
ISYU SA WAR ON DRUGS
Nahibaluan nga matunog subong nga gina-istoryahan kun posible ayhan nga magbalik si Mabilog kasunod sang joint public hearing sang House Committees on Dangerous Drugs, Public Order and Safety, Human Rights, and Public Accounts.
Diri nga hearings nabukaran ang sampaw-sampaw nga mga kontrobersyal nga isyu sa war on drugs ni Duterte.
Matandaan nga sang una nga bes nga ginpatigayon ang hearing sa Kamara, si Iloilo City Lone Representative Julienne “Jamjam” Baronda ang nagbukad sa istorya sa anay pag-tag sa Iloilo City bilang “most shabulized city” sa Pilipinas kag nagpanawagan man sa reevaluation sa kaso ni Mabilog.
Gintawag anay ni Baronda nga isa ka human rights violation ang mga aktwasyon ni Duterte batok sa former mayor sang Iloilo City.
Sa ikatlo nga hearing naman sang quad committee, liwat nga naistoryahan ang Iloilo City sang nagpungko bilang resource person kag may ginpangbulgar nga kontrobersiya ang mismo central figure sa war on drugs nga si Police Lieutenant Colonel Jovie Espenido.
Kahapon, Agusto 28, ginkwestyon ni Abang Lingkod Party-list Representative Joseph Stephen Paduano si Espenido kun sin-o ang nagsugo sa iya agud magpadulong sa Iloilo City kag magtinir sang duha ka bulan apisar nga wala man sang pormal nga mando sa iya.
Nagsabat naman si Espenido nga mismo si former Police Regional Office 6 Director Rene Pamuspusan ang nagsugo sa iya apang ini ang verbal lamang kag wala sang pormal nga sulat.
Ginpatihan nga sang gin-assign si Espenido sa Western Visayas, target nga patyon man si Mabilog rason nga wala pa man kaabot ang amo nga pulis sa Iloilo, nagbiya na si Mabilog padulong sa luwas sang pungsod para sa iya seguridad kag iya pamilya.
Ginsuhestiyon naman ni Paduano nga imbitaron si Mabilog nga magtambong sa hearing agud magsabat sa pagbansag sa iya bilang drug protector.#
