Ginplastar sang Commission on Elections (Comelec) – Iloilo City nga mahimo pa makabalik ang record ni anay Iloilo City Mayor Jed Patrick Mabilog sa voter’s list kun mag-apply ini para ma-reactivate ang amo nga rekord apisar nga yara siya sa luwas sang pungsod.
Sa interview sang Bombo Radyo kay Mr. Jonathan Sayno, Election Assistant II sang amo nga talatapan, iya ginpahayag nga duha ang pwede mahimo sang anay alkalde nga amo ang aplikasyon para makaboto kag pwede makapadalagan.
Una nga gin-athag sang opisina nga deactivated na ang record ni Mabilog antes pa man ang eleksyon sang nagligad nga tuig bangud wala ini nakabato sa 2019 local elections kag 2022 presidential elections kag mangin sa 2023 barangay elections.
Sulod ini sa nakabutang sa Voter’s Registration Act nga ma-deactivate ang record sang botante kun mapaslawan ini nga makaboto sa duha ka magkasunod nga piniliay.
Mahimo lamang ini makaboto ukon makakapili sa Mayo 12 sa masunod nga tuig kun makumpleto na sini ang reactivation process.
Nahibaluan nga gintalana sang poll body ang katapusan nga adlaw sang local kag overseas registration sa Septyembre 30 kag wala na sang gin-anunsyo nga extension.
Matunog nga ginahambalan ang record sang anay alkalde bangud ginabati-bati ini nga magabalik sa pulitika apisar nga wala man sang kumpirmasyon halin mismo sa iya halin sang nagtinir na ini sa luwas sang pungsod.
