Gindagdagan sang Korean Basketball League (KBL) sang 3 million won ($2,317 ukon masobra P128,000) nga multa ang anay National Basketball Association (NBA) player nga si Chinanu Onuaku bangud sa involvement sini sa natabo nga pagkatumba sang Filipino star nga si Rhenz Abando nga rason sang malala nga injury sini sa likod.
Natabo ini sa hampang sa tunga sang Anyang KGC kag Goyang Sono Skygunners sang nagligad nga Huwebes.
Base sa video, nakit-an nga ginbungguan ni Onuaku si Abando sang nagtumbo ini para sa rebound rason nga natumba ang Pinoy player kag nag-resulta sa multiple spinal fractures.
Ginpahayag nga nakit-an sang liga nga hungod ang pagbunggo kay Abando bisan pa nga gintawag ini sang referees nga regular foul sang tion sang hampang.
Bilang dugang nga kunsekwensya, ginpaandaman man sang liga ang referees bangud sa amo nga hitabo.
Wala sang gin-mensyonar ang liga nga suspensyon batok kay Onuaku nga player anay sang Houston Rockets sa sulod sang tatlo ka tuig.
Si Abando naman amo ang Anyang Red Boosters import nga ginabansagan man anay nga “nagalupad nga player” sang Gilas Pilipinas sa 2023 FIBA World Cup.
Ginalantaw nga isa ka bulan ini nga indi makahampang bangud sa injury kag posible man nga indi na makapasakop sa KBL All-Star Weekend kag sa iya nga Slam Dunk title defense.
