Gin-athag sang anay head sang Iloilo Provincial Disaster Risk Reduction Management Office nga si Dr. Jerry “Daklod” Bionat nga ang linog nga naeksperyensyahan kahapon, Marso 2, ang bangud sa West Panay Fault Line.
Sa interview sag Bombo Radyo kay Bionat, iya ginpahayag nga isa ini ka active fault line gani nagakatabo ang pagtay-og sang duta sa idalom sini sa wala mahibaluan nga tion.
Suno pa kay Bionat, ginatudlo man ini nga rason kun ngaa permi nagakatabo ang linog sa mga kabanwahanan sang Premier distrito ilabi na sa banwa sang Tigbauan, Guimbal, San Joaquin kag Igbaras.
Ginsaysay man ni Bionat nga ang ini nga fault line amo ang ginatawag nga strike-slip fault, kun sa diin nagaligdasanay ang duha ka trench sang duta sa palibot sang 10 ka kilometro ang kadalumon.
Dugang pa sini nga bangud nga manabaw ang kadalumon sang linog, mas mabaskog ang mabatyagan sini sa kadutaan.
Nag-abiso man ang anay head sang PDRRMO nga magahalong kag magpreparar bangud wala mahibalui kun masundan pa ini nga linog.
