ILOILO CITY — Ginpanginwala ni Former Philippine National Police (PNP) chief Oscar Albayalde nga may nabayolar nga tawhanon nga kinamatarong ang maduguon nga war on drugs ni Former President Rodrigo Duterte, sa diin linibo ka mga indibidwal ang napatay.
Ini ang ginpahayag ni Albayalde sa tunga sang nagapadayon nga imbestigasyon ng International Criminal Court’s (ICC) sa mga pagpatay nga nagluntad sa pungsod.
Suno kay Albayalde, nag-agi sa layi ang kampanya sang Duterte administration batok sa iligal nga druga kag wala sang ano man nga layi sang pungsod ang nalapas sang anay administrasyon.
Ginpahayag man sini nga ang ginpatuman sang Duterte administration amo ang “Oplan Double Barrel” kag wala nakasaad sa tikang nga kun may madakop nga nagagamit sang druga amo ang patyon.
Gin-athag man ni Albayalde nga wala sila sang may nabaton nga mandu halin kay Duterte nga patyon ang mga nagakaladakpan apisar nga makita kag mabatian sang mga tawo ang mga statement nga ginabuyagyag sa TV sang anay presidente.
Nagapati man ang natungdan nga legal ang tanan nga police operations nga ila ginpatuman kag naberipika sang Internal Affairs Service sang Philippine National Police (PNP).
Apang, una na nga ginpahayag ni ICC Assistant to Counsel Kristina Conti nga ang duha ka anay hepe sang PNP, lakip si Senator Ronald Dela Rosa ang ginapahayag “primary enforcers” sang anti-drug campaign ni Duterte ang dapat pasabton kag mangin responsable sa pagsunod sa mandu nga nagresulta sa extrajudicial killings.
Nagalaum naman si Albayalde nga manindugan si President Ferdinand Marcos Jr. nga magakalas ini sa International Criminal Court’s (ICC).
Nagpaninundugan man ini nga may yara sang insakto nga justice system ang pungsod Pilipinas kag kun pasudlon pa ang ICC, posible nga kadlawan lang kita sang iban nga nasyon bangud indi kita makatindog sa kaugalingon nga justice system.
