Ginatugyan na lang ni former President Rodrigo Roa Duterte sa Ginuo kun ano man ang iya mangin kapalaran.
Ini ang ginhambal ni Duterte sa iya anak nga si Vice President Sara Duterte samtang didto siya sa detention facility sa The Hague, Netherlands kag nagahulat sa masunod nga proceedings sang International Criminal Court (ICC) kaangot sa kaso sa iya nga crimes against humanity.
Suno kay Sara matapos nagbisita sa Hague Penitentiary Institution, ginabaton sang iya amay kun ano man ang matabo sa iya. Apang apisar sini, ginsiling sang bise-presidente nga indi ini mag-surrender sa ginapangatubang subong.
“Sabi niya, ‘Ipapasa-Diyos ko na yan lahat. Kung anong mangyari sa buhay ko, so be it,’” suno sa bise-presidente.
Ginpakigbahin ni Sara nga kun magbisita siya sa iya amay, recorded ang ila nga gina-istoryahan, bangud ang abogado lamang sini ang may pribilehiyo nga maka-istorya sa iya sa confidential nga legal matters.
Nagpanugyan man ang mga doctor kay Duterte nga maglakat-lakat, kag pwede ini sa sunod makaguwa sa pasilidad para nga mag-exercise apang i-subject anay sa security arrangements.
Una na nga ginsiling ni Sara nga indi siya magpauli diri sa Pilipinas samtang wala pa ma-finalize ang legal team sang iya amay.
Ginahulat man sini ang ila pamilya nga makaabot sa The Hague kag ginalauman nga makatambong sa pagtilipon sang Duterte supporters subong nga Marso 23.
Lakip sa magakadto sa Netherlands sa masunod nga semana amo ang iloy ni Sara nga si Elizabeth Zimmerman, apang indi sigurado kun tugutan ini nga makabisita sa detention facility bangud indi na ini makonsiderar ng next-of-kin bangud annulled na ang ila kasal sang former president.#
