Natugyan na sa kustodiya sang International Criminal Court (ICC) si former President Rodrigo Roa Duterte kasunod sang iya pag-abot sa Netherlands kagab-i.
Sais minutos antes ang alas 12 sa tungang-gab-i (oras sa Pilipinas) sang naghugpa ang eroplano nga ginasakyan sang anay punong ehekutibo sa Rotterdam nga amo ang pinakamalapit nga airport sa The Hague kun sa diin nahatamtang ang international tribunal.
Pasado naman alas tres sa kaagahon (PST) sang nag-abot ang convoy sakay si Duterte sa Scheveningen detention facility.
Madamo nga mga Pilipino kag Duterte supporters ang nagahulat sa guwa sang pasilidad kun sa diin ang iban sa ila ang nagasinggit nga ibalik ang former president sa Pilipinas.
Mismo ang korte ang nagkumpirma sa ila website nga na-surrender na sa ila si Duterte kasunod sang warrant of arrest nga gin-serbe bangud sa mga kaso nga “murder” nga makabig suno sa ICC nga “crime against humanity.”
“Mr Rodrigo Roa Duterte… was surrendered to the custody of the International Criminal Court,” suno sa ICC. “He was arrested by the authorities of the Republic of the Philippines in accordance with an arrest warrant issued… for charges of murder as a crime against humanity.”
Sa video nga na-post sa official facebook page ni Duterte antes nag-abot sa The Hague, ginpasalig sini sa iya supporters nga maayo ang iya nga kondisyon kag wala sang dapat nga kabalak-an.
Ginbalikan sini ang iya statement nga wala sang kahangaw-an ang mga pulis kag militar sa iya ginpangsugo, bangud siya ang manabat kag proteksyunan niya sila.
“Okay lang ako. Do not worry, and I think this has something to do with the law and order noon. At sinasabi ko naman sa mga pulis, military na, trabaho kayo at ako ang managot. So, ito na nga,” pahayag sini.
“For all of the whatever happened in the past, ako na ‘yung nag-front sa ating law enforcement pati military. Sinabi ko na, I will protect you and I will… ako ang managot sa lahat,” dugang pa ni Duterte.
Dugang sini, padayunon niya ang pagserbe sa iya pungsod, bisan ano pa kalawig ang legal proceedings.
“This will be a long, legal proceedings but I say to you, I will continue to serve my country and so be it kung ganun ang destiny ko. Salamat,” kabahin pa sang iya statement.
Kun basehan ang ICC, may hearing pa nga i-schedule antes ang initial appearance sang former president sa international tribunal.
