Kumbinsido si Former Presidential Legal Counsel Atty. Salvador Panelo nga magadalagan sa pagka-presidente si Vice President Sara Duterte sa 2028 Elections.
Suno kay Panelo, sigurado nga magadalagan ang bise presidente sa masunod nga Presidential Elections.
Ginpanindugan sang anay Duterte appointee nga indi kuntani matabo ang conflict nanday Duterte kag Marcos kun una na nga nagdesisyon si VP Sara nga magpadalagan sa pagka-presidente sa 2022 elections.
Talalupangdon nga si VP Sara nagsiling na sang una nga ‘seryoso nga ginakonsidera’ niya ang pagpadalagan sa pagkapresidente sa 2028.
Una nga gin-impeach si VP Sara sa Kamara sang Pebrero 5, samtang ginalauman nga magapadayon ang impeachment trial sa masunod nga mga binulan.
Kon lubos siya nga mapahalin sa pwesto paagi sa impeachment, ma-disqualify siya sa pag-uyat sang anuman nga public office, base sa probisyon sang kasuguan.
Una na nga nag-file sang petisyon sa Korte Suprema ang isa ka abogado nga nagahingyo sang pag-issue sang court order nga naga-require sa Senado nga gilayon nga aksyonan ang kaso nga impeachment batuk kay Vice President Sara Duterte.
Sa petisyon nga gipasaka ni Atty. Catalino Generillo Jr., iya ginhingyo sa korte nga mag-issue sang writ of mandamus agud gilayon nga ipatawag ang mga Senador bilang impeachment court kag gilayon nga magpatigayon sang public trial kasunod sang pag-file sang impeachment case sang Kamara.
