𝗠𝗔𝗡𝗜𝗟𝗔 —Iga-detain sa sulod sang 24 oras sa Kamara ang anay presidential spokesman nga si Harry Roque matapos gin-cite in contempt sang apat ka komite sang Kamara nga naga-imbestigar sang Philippine Offshore Gaming Operators ukon POGO-related crimes kag war on drugs.
Ini kasunod man pagkatapos nga gintudlo ni Kabayan Party-list Representative Ron Salo nga nagbinutig ang anay tigpamaba sa rason sang indi niya pag-attend sa hearing sang Agosto 16.
Si Roque isa ka anay tiglawas man sang Kabayan party-list.
Ginpresentar ni Salo sa komitiba ang kopya sang sertipikasyon gikan sa Manila Regional Trial Court nga wala sang hearing si Roque sang Agosto 16 kag wala nag-atubang sa mga korte sang Manila sang nasambit nga petsa.
Si Surigao del Norte Representative Ace Barbers, chairman sang House Committee on Dangerous Drugs, nagsiling nga ang mga rekord sang korte nagapakita nga ang hearing nga ginahambal ni Roque sa iya wala pagtambong natabo sang Agosto 15.
Apisar nga ang mamalidha sang Northern Samar nga si Paul Daza amo ang nagaisahanon nga wala mag-ugyon, gindala sang komite ang mosyon ni Salo nga i-cite for contempt si Roque.
Bangud sa contempt order, iga-detain sa Batasang Pambansa Complex si Roque sa sulod sang 24 oras bilang konsiderasyon nga anay ini miyembro sang Kamara kag ang iya pagpangayo sang pasaylo sa iya ginhimo.
Nagapangatubang sang imbestigasyon si Roque angot sa iya ginapahayag engagement bilang abogado sa Lucky South Star 99 POGO firm, kun sa diin nakumpiskar ang mga pagkabutang sang iya anay staff sa Malacañang kadungan sang raid sang mga otoridad sa Porac, Pampanga.
Ginpanginwala niya nga nagserbe siya nga abogado sang Lucky South 99, nga nagasiling nga naghatag lamang sia sang laygay nahanungod sa pagkuha sang mga lisensya sang POGO para kay Cassandra Ong nga nagrepresentar sa Whirlwind firm, indi sa Lucky South 99.
Gintinguhaan ni Roque nga i-apelar ang contempt order paagi sa pagsambit sang iya kinamatarong sa kahilwayan, apang suno kay Barbers, ini ang resolbahon sa masunod nga adlaw sang hearing.
