Former Rep. Manuel kay Marcos: ‘Normal pa bala nga nag-doble ang presyo sang gatong?’

Ginbali ni former Kabataan Partylist Rep. Raoul Manuel ang pahayag ni President Ferdinand “Bongbong” Marcos, Jr. nga “normal” pa man ang tanan subong.

Kasunod ini sang pahayag sang presidente nga diri sa Pilipinas, normal man ang presyuhanay kag ginasigurado sang gobyerno suno sa iya nga maayo ang suplay sang pagkaon, bugas, kag tanan nga basic goods.

Suno naman sa former representative nga tumandok sang Iloilo, amo ini ang rason kun ngaa dapat nga magpadayon nga maghulag ang pumuluyo sa baylo nga maghipus-hipos lang kag pabay-an lang ang gobyerno kun ano ang obrahon.

“Normal pa bala nga nag-doble ang presyo sang gatong? Te ang pamangkot naton, ano ni ya ang aton nga gobyerno man? Nagapabungol-bungol lang bala ini, ukon daw kadamol lang bala sang iya nga guya para maghambal pa nga normal ang tanan?,” suno sa anay kongresista.

Ginpahayag sini nga naandan na lang sang gobyerno nga protektahan ang interes sang dalagku nga mga kumpaniya lakip na ang oil companies.

Ginpanawagan ni Manuel sa publiko nga dapat saligan ang paghugpong sang isa kag isa kag pagbato sa kinamatarong sang mga driver, operator, kag commuter sa tunga sang ginapangatubang subong nga krisis.

Nahibaluan nga ginhiwat ang ikaduha nga adlaw sang transport strike subong nga adlaw, Marso 20, malapit sa University of the Philippines Visayas sa Iloilo City nga gin-updan sang mga driver, operator, kag nagkalain-lain nga mga sector.