𝗜𝗟𝗢𝗜𝗟𝗢 𝗖𝗜𝗧𝗬 — Nagalaum si former senator Franklin Drilon nga padayunon ni President Ferdinand Marcos, Jr. ang paghatag sang project sa Iloilo kaangay na lamang sa dugang nga pondo nga ginhatag sini sa Jalaur River Multipurpose Project Phase 2 sa Calinog, Iloilo.
Sa interview sang Bombo Radyo kay Drilon, iya ginpahayag nga kasunod sang inagurasyon sang Jalur Dam, dako ang posibilidad nga mangin isa man ka ‘game changer’ sa Visayas ang Panay-Guimaras-Negros Bridge nga ginalauman sini nga mahatagan sang priority sang administrasyon ni Marcos.
Suno kay Drilon, anay na nga namensyor sang administrasyon ni former President Rodrigo Duterte ang Panay-Guimaras-Negros Bridge apang wala gid naumpisahan kag nahatagan sang igtalupangod.
Ginpahayag man sini nga ang plano sa amo nga proyekto ang naghalin pa sa panahon ni former President Cory Aquino nga may tinutuyo nga makonektar ang tatlo ka mga isla sang Panay, Guimaras, kag Negros.
Nagapati naman ang anay nga senador nga dako ang mabulig sa ekonomiya sang Pilipinas kon tingbon ang tatlo ka mga isla sa Western Visayas.
Nagalaum man ang natungdan nga liwat mamensyonar ni President Marcos ang Panay-Guimaras-Negros Bridge agud nga mahatagan sang prayoridad kag matigayon na nga mahuman.
Nahibaluan nga santo sa Department of Public Works and Highways (DPWH) maumpisa tukuron ang first section sang taytay sa first quarter sang 2025.
