ILOILO CITY- Ginalantaw sang Ilonggo nga si Former Senate President Franklin Drilon nga ang pagtunga sa Iloilo City sa duha ka legislative districts ang magasolbar sa agaway sa pwesto sa tunga sang mga Baronda kag Treñas.
Sa interview sang Bombo Radyo kay Drilo, iya ginpahayag nga magluwas nga mangin solusyon ini sa agaway sa posisyon sa pulitika nanday incumbent Congresswoman Julienne “Jam-jam” Baronda kag bata ni Mayor Jerry Trenas nga si Executive Assistant Raisa Trenas-Chu nga una na nga nagkumpirmar sang plano nga pagpadalagan sa pagka-kongresista sa 2025 midterm elections, makahatag man ini sang mas madamo nga proyekto sa siyudad.
Suno kay Drilon, kwalipikado ang syudad nga tungaon sa duha ka legislative districts.
Pahayag niya, kun masuguran ini gilayon, mahimo nga mahingagaw ini nga mapasar antes pa ang eleksyon.
Apang gin-athag sini nga magadepende sa gihapon ang dalagan sini nga lihok sa mga myembro sang kongreso.
Matandaan nga sang 2019, una nga ginduso ang hagna kun sa diin sakop sang first legislative district ang Jaro, La Paz kag Mandurriao, samtang sakop naman sang second legislative district ang City Proper, Molo, Arevalo, kag Lapuz.
