Nagpabutyag sang iya tuman nga pagkadismaya si former Senate President Franklin Drilon sa nagaluntad nga korapsyon sa Pilipinas.
Ginpunto sini ang mga palpak nga mga proyekto sa imprastaktura, flood control projects kag ilabi na ang farm-to-market roads nga suno sa iya, nangin farm-to-pocket roads.
Nagpanawagan man ini sa Office of the Ombudsman nga dasigon ang imbestigasyon sa flood control projects sa partikular sa Iloilo City kun sa diin nagabalor ini sang kapin ₱1.4 billion.
Suno kay Drilon, wala siya sang makita nga bastante nga paathag kun ngaa tuman ka dako ang budget kun ipaanggid sa mga flood control project sa iban nga mga lugar.
Nagpaandam si Drilon nga kun pabuyan-buyanan ini sang Ombudsman, magalala lang ang korapsyon sa mga proyekto nga pang-imprastraktura.
Gindugang naman ni Drilon nga 20% sang economic growth sang pungsod ang bangud sa government spending sa infrastructure, salary, social services kag iban pa, apang subong, ang amo nga porsyento ang wala nagakadto direkta sa mga government programs kundi halos sa bulsa na sang mga kurap nga opisyal.
Nagpangabay naman ini sa mga opisyal sa syudad sang Iloilo nga mag-ugyon agud nga mas mangin maayo ang ila nga serbisyo sa publiko kag matapna na ang korapsyon.
