Gindagdagan sang China sang sanctions si former senator Francis Tolentino paagi sa pag-ban sa iya nga makasulod sa mainland, sa Hong Kong, kag sa Macao bangud sa ginaalegar indi manami nga mga pahayag sini sa mga isyu naangot sa China.
Ginhimo sang Chinese foreign ministry spokesperson ang announcement isa ka adlaw matapos nagtakop ang termino ni Tolentino bilang senador.
Ginpanindugan sang spokesperson nga depensahan sang Chinese government ang ila national sovereignty, security, kag development interests sa pihak sang mga pahayag sang gintawag nila nga anti-China politicians halin sa Pilipinas.
Bilang sabat, gin-abi-abi ni Tolentino ang sanctions sa iya nga gintawag pa niya nga “badge of honor.”
Suno kay Tolentino, ini isa ka testamento sang indi malingkang nga commitment niya agud prrotektahan ang national interest kag dignidad sang mga Pilipino.
Nahibaluan nga si Tolentino ang nag-sponsor sa Senado sang Philippine Maritime Zones Act nga isa ka deklarasyon nga ang Manila nagahimo sang iya soberenya kag jurisdiction sa internal waters sini , territorial sea archipelagic waters, kag airspace, kalakip na ang seabed kag subsoil.
Ini naangot sa United Nations Convention on the Law of the Sea ukon UNCLOS kag iban nga layi kag treaties.
Ang layi nagasiling man nga ang Pilipinas ang may kinamatarung kag pribilehiyo sa high seas kag international seabed nga nasaad sa UNCLOS kag iban nga treaties kag kasuguan.
