USA – Ginpamatbatan nga guilty si anay United States President Donald Trump sa 34 ka counts sang pagpeke sang business records agud maimpluwensyahan ang resulta kag integridad sang 2016 election.
Ini nga maragtason nga desisyon ang ginpaguwa kadungan sang ikaduha nga adlaw sang deliberasyon sang 12 ka jurors sa New York.
Si Trump nga isa man subong ka presumptive Republican presidential nominee amo ang labing-una nga presidente sa maragtas sang Estados Unidos sang Amerika nga na-convict sa kaso-kriminal.
Sandig sa unanimous nga desisyon sang 12 ka jurors, gin-falsify ni Trump ang record agud nga matabunan ang $130,000 ukon P7.6-million nga hush money payment sa adult film star nga si Stormy Daniels agud maimpluwensyahan ang eleksyon.
Ini nga verdict ang ginpaguwa man matapos nga gin-indict sang grand jury si Trump sang Marso 30, 2023 nga amo man ang labing-una nga tion nga na-indict sa kaso-kriminal ang former ukon sitting president sang Estados Unidos.
Gin-schedule naman ang pag-sentensya sa Hulyo 11 subong nga tuig.
Gintawag naman ni Trump nga indi patas ang hush money trial batok sa iya.
Suno kay Trump, biased ang judge nga si Judge Juan Merchan kag nagareklamo man ini sa gag order.
Sa iya social media platform, gintawag man ni Trump nga “UNFAIR, MISLEADING, INACCURATE, AND UNCONSTITUTIONAL” ang instructions sang huwes kag ginahambalan man sini ang judge nga “HIGHLY CONFLICTED”.
Ginasulit man ni Trump nga ini nga trial ang isa ka witch hunt kag election interference bangud magapadalagan ini liwat sa eleksyon subong nga tuig.
Ginsiling man sini nga ginalapas sang trial ang iya nga civil rights.
Ginbasol man ni Trump ang Biden administration bangud sa pamatbat sa iya.
