ILOILO CITY- Indi magtambong sanday anay Vice Presidents Leni Robredo kag Jejomar Binay sa ikatatlo nga State of the Nation Address (SONA) ni Presidente Ferdinand Marcos Jr. sa Hulyo 22.
Suno kay House Secretary General Reginald Velasco, gin-decline sang duha ka anay opisyal ang imbitasyon.
Wala naman ginplastar ang rason kun ngaa indi magtambong ang duha.
Samtang, wala pa makapadala sang ila sabat sa imbitasyon sanday Vice President Sara Duterte kag amay nga si anay President Rodrigo Duterte.
Sa subong, masobra sa 2,000 ka mga bisita na ang nagkumpirma sang attendance kalakip na ang mga representatives naggikan sa 47 ka foreign embassies sa pungsod.
Samtang, nagpahanumdom naman ang House Secretary General sa mga bisita nga indi pagpasudlon sa plenaryo ang sin-o man nga magsuksok sang bayo nga may mensahe sang pagprotesta.
Apisar wala sang nabaton nga pagpamahog ang House of Representatives, mangin hugot sa gihapon ang ipatuman nga seguridad sa sulod kag palibot sang Batasan complex.
