Gindugangan sang Japan ang listahan sang pinakadaku nga World Cup upset subong nga tuig paagi sa paglutos sa four-time World Champions nga Germany, 2-1.
Una nga naka-skor ang Germany paagi sa penalty kick ni İlkay Gündoğan sa ika-33 nga minuto sang hampang. Gin-dominar sang team ang daku nga tion sa match kag may tyansa nga ma-extend kuntani ang lead, apang wala na ginpalampas sang Japan sang nahatagan sila sang tyansa nga maka-goal.
15 minutos antes matapos ang hampang, naka-skor si Ritsu Dōan para sa Japan. Pagkatapos sini, sa ika-83 nga minuto sang hampang ukon siyam ka minutos antes magtapos ang match, gindugangan ni Takuma Asano ang goal para sa pungsod nga nagkibot sa World Cup fans.
Tanan nga Japanese fans ang nagatindog na tubtub sa final minutes sang game bangud sa nasaksihan nga upset nga ginapahayag kaangay man sa natabo sa hampang sang Argentina kag Kingdom of Saudi Arabia kagab-i.
Ang Germany amo ang kampyeon sa World Cup sang 2014, apang wala na ini nakalusot sa group stage sang 2018 World Cup sa Russia — ang ila earliest World Cup exit halin sang 1938.
