Ginalauman nga magapauli subong nga adlaw sa Pilipinas sanday anay Presidente Rodrigo Duterte kag iya bata nga si Vice President Sara Duterte matapos ang pagpakigkita sa Filipino community sa Hong Kong.
Base sa airport sources, lakip ang duha sa Cathay Pacific flight apang indi lang klaro kun ano sila nga flight bangud madamo sang Manila-bound flights nga halin sa Hong Kong subong nga Martes.
Nagtambong ang duha sa “Pasasalamat kay PRRD with OFWs” event sa Southorn Stadium sa Wan Chai nga gin-organisar sang mga miyembro sang Kingdom of Jesus Christ (KOJC).
May mga kritiko nga nagsiling nga ang byahe sang mga Duterte ang posible may kaangtanan sa nagalapta nga impormasyon nga napaguwa na sang International Criminal Court (ICC) ang arrest warrant batok sa former president bangud sa alleged crimes against humanity sang ginpatuman ang kontrobersyal nga drug war.
Sa pihak nga bahin, may impormasyon naman nga mismo ang chief sang Philippine National Police (PNP) nga si General Romel Marbil ang nagpadulong sa Ninoy Aquino International Airport (NAIA) kahapon nga ginalantaw preparasyon sa pag-abot sang former president.
Indi parte sang mandato sang PNP chief ukon sang kapulisan nga abi-abihon gid ang former president kun mag-abot ini sa pungsod.
Wala man sang bisan isa sa Marcos administration ang nagkumpirma nga nag-abot na gid man ang warrant, apang ginsiling sang Malacañang nga handa ang gobyerno kun ano man ang matabo kag preparado nga maghatag sang assistance kun hingyuon ini sang Interpol.
Suno naman kay PNP spokesperson Police Brigadier General Jean Fajardo, magasunod sa proseso ang pulis bangud may legal obligation sila nga ihatag ang assistance kun pangayuon ini sang Interpol, kaangay man sang assistance nga ginahatag sang iban nga nasyon sa Pilipinas kun kinahanglanon.
Gin-cite sini ang kaso ni dismissed Bamban, Tarlac mayor Alice Guo nga nadakpan sa bulig sang Indonesian police sang nalagyo ini sa Pilipinas sang 2024 matapos gin-angot sa POGO kag ginbulgar nga isa gali ka Chinese national nga si Guo Hua Ping.
Bisan nga nag-withdraw na ang Pilipinas sa membership sa ICC sa idalom sang Duterte administration, nahibaluan nga member party ini gihapon sang Interpol.
Talalupangdon nga sang nagligad nga mga kaso, nagapangayo sang bulig ang ICC sa Interpol nga mag-isyu sang Red Notice sa ila mga suspek.
Ini nga Red Notice indi makabig nga international arrest warrant, apang ginaalerto sini ang member countries kaangay sang Pilipinas nga wanted ang isa ka subject.
“On the part of the PNP, dadaan tayo sa processo. Kung mayroong hihingi tulong yung Interpol throught their National Central Bureau. The PNP has a legal obligation to reciprocate ‘yong courtesy na ibinibigay po sa atin ng Interpol,” suno kay Fajardo sa press briefing, Marso 10.
“We are fully prepared for any eventualities po in case po na merong tulong na hihingin sa atin ang Interpol po,” dugang sini.
Sa bahin sang Department of Justice (DOJ), ginsiling sang spokesperson sini nga si Atty. Mico Clavano nga naga-trabaho ang National Central Bureau sang Interpol sa Pilipinas kaupod sa Bureau of Immigration (BI) kag sa National Bureau of Investigation (NBI).
Ang PNP ang sa idalom sang liderato ni Interior Secretary Jonvic Remulla, samtang ang BI kag ang NBI ang sa idalom naman sang hurisdiksyon sang iya utod nga si Justice Secretary Jesus Crispin Remulla.
Sa subong suno kay Clavano, wala man sila sang nabaton nga notice of arrest warrant halin sa ICC.
“If ever there are instructions from the Interpol and of course dahil nagsign po tayo sa international agreement na yan, we are bound to oblige and to respect that,” pahayag sang DOJ spokesperson.#
