ILOILO CITY – “In high spirit” si Fr. Teresito “Chito” Suganob sa pihak sang naagyan sini sa kamot sang terorista nga Maute.
Sa interview sang Bombo Radyo Iloilo, ginpahayag ni Lanao del Sur Assemblyman Zia Alonto Adiong nga kaupod sa pagdul-ong kahapon kay Fr. Suganob sa Manila, bilib siya sa positive attitude sang pari.
Suno kay Adiong, nakapalagyo si Suganob upod ang Ilonggo nga manunudlo nga si Lordvin Acopio, sang mag-spray sang tear gas ang mga otoridad sa kuta sang Maute.
Bangud sang tear gas suno sa opisyal, napuhag ang mga rebelde sa Bato Ali mosque rason nga nakapalagyo ang duha ka mga hostages.
Apang ginpahayag ni Adiong nga wala nila maistoryahan sang pari ang iya naagyan sa kamot sang Maute bangud nga gusto nila mabatyagan ni Fr. Suganob nga hilway na ini kag normal na ang kabuhi.
Ginpahayag ni Adiong nga ang naistoryahan nila ni Fr. Suganob kun ano ang gusto kan-on kag buhaton sang pari subong nga hilway na ini.
Gusto ni Fr. Suganob nga magkaon sang otan matapos ini mahilway sa kamot sang mga rebelde.