ILOILO CITY – Posible nga indi na magbalik sa Marawi ang Ilonggo priest nga si Fr. Teresito “Chito” Suganob, nga gin-hostage sang Maute terror group.
Suno sa utod ni Fr. Chito nga si Roquito “Boyet” Suganob, kun makapauli sa South Cotabato, magapahuway anay ang pari.
Ginpahayag ni Boyet sa interview sang Bombo Radyo Iloilo nga santu sa ila paghambalanay sang utod, padayunon ni Fr. Suganob ang pagka-pari, apang posible nga sa South Cotabato na lang ukon diri sa Iloilo.
Ginkumpirma man ni Boyet nga magapadulong sa ila mga himata diri sa Iloilo si Fr. Suganob kag magapatigayon sang Thanksgiving mass.
Una na ginkumpirma ni Mr. Suganob sa Bombo Radyo Iloilo ang pagpauli ni Fr. Chito sa Norala subong nga semana, matapos nga ginpahanugutan na ini sang militar.
