ILOILO CITY- Ginsentensiyahan sang korte sa Tagum, Davao del Norte sanday ACT Teachers party-list Representative France Castro kag former Bayan Muna party-list representative Satur Ocampo sang tubtob anom ka tuig nga pagkapreso bangud sa ‘child abuse’ sang Nobyembre 2018.
Sa 25 ka pahina nga desisyon,ginpamatbatan sang Tagum Regional Trial Court Branch 2 nga guilty sanday Castro, Ocampo, kag 11 ka iban pa bangud sa paglapas sa Section 10(a) sang Republic Act 7610 ukon Special Protection of Children Against Abuse, Exploitation, and Discrimination Act.
Ginmanduan man sang korte ang mga ini nga magbayad sang P10,000 bilang civil indemnity kag P10,000 bilang moral damages sa kada minor kag may interest rate nga 6% per annum halin sa finality sang desisyon tubtob nga maubos bayaran.
Gin-acquit naman sang korte sanday Pastor Edgar Ugal, Rev. Ryan Magpayo, Eller Ordeniza, kag Rev. Jurie Jaime bangud sa kapaslawan sang prosekusyon nga pamatud-an nga ‘guilty beyond reasonable doubt’ ang mga ini.
Ini ang nag-ugat sa trafficking charge nga ginpasaka batok sa ila kag 17 ka iban pa bangud sa pag-upod sa mga minors sa ila solidarity mission sa Talaingod, Davao Del Norte sang Nobyembre 2018.
Samtang, gintawag naman nanday Castro kag Ocampo nga unacceptable and unjust ang desisyon sang korte.
