Gin-anunsyo ni Alliance of Concerned Teachers (ACT) Representative France Castro nga magapadalagan siya sa pagka-senador sa 2025 midterm elections.
Sa iya speech sa 42nd anniversary sang ACT, ginsiling sini nga ini nga tikang amo ang iya sabat sa open letter nga iya nabaton halin sa mga manunudlo nga nagpanawagan sa iya nga ipasaka sa Senado ang iya ginapakigbato para sa pagbag-o sa sistema sang edukasyon sa pungsod.
Suno pa sa mamalidha nga isa sa mga lider sang oposisyon sa Kamara kag subong nagapungko bilang deputy minority leader, luyag niya nga padayunon ang pagduso para sa “genuine reforms” sa mas mataas nga kapasidad bilang isa ka public servant.
“Gusto natin through the Makabayan, magkaroon ng alternative din sa eleksyon. Hindi tayo nasasapatan sa nangyayaring bangayan lang ng mga naghaharing uri: Marcos vs. Duterte, at iba pa,” kabahin sang speech.
“May ibang oposisyon, pero gusto natin isulong ang tunay na pagbabago, kaya gusto natin magsulong ng isang Makabayan na alternatibo na tatakbo sa Senado. Tinatanggap ko po ang hamon ng Alliance of Concerned Teachers at ng ating Sambayanan,” dugang sini.
Kilala si Castro nga matunog kag maisog nga kritiko sang mga Duterte.
Ang iya pag-anunsyo sang iya plano ang natabo isa ka adlaw matapos ginkumpirma ni Vice President Sara Duterte nga ang iya amay nga si anay Presidente Rodrigo Duterte kag mga utod nga sanday Davao Congressman Paolo Duterte kag Davao City Mayor Sebastian Duterte ang lunsay magapadalagan sa Senado sa 2025.
