Apisar nagapanguna ang Israel sa kadam-an sa mga pungsod sa kalibutan bangud sang madasig nga vaccination drive, wala nagakumpiyansa ang otoridad kag naga-todo diskarte sa gihapon agud makumbinse ang bug-os nga populasyon nga magpabakuna batok sa COVD-19.
Sa duha ka vaccination centers sa syudad sang Tel Aviv sa amo nga pungsod, nag-partner ang gobyerno sa local restaurants agud magtanyag sang libre nga pagkaon agud maganahan man ang mga tawo nga i-avail ang bakuna.
May pizza, filo pastry, dessert, kag kape nga sarang ma-enjoy ang mga nagapabakuna.
May yara man sang Israeli bar nga nagserbe nga COVID-19 vaccination clinic nga nagtanyag man sang free non-alcoholic drinks sa mga nakapabakuna na.
Magluwas diri, sang Pebrero 21, ginrelease man ang ginatawag nga vaccine passport.
Ang mga tawo nga may yara na sang full vaccination ang mahimo maka-download sang application nga naga-display sang ila green pass.
Ang green pass amo ang ginapakita sa otoridad agud makasulod ang isa ka tawo sa gyms, hotels, swimming pools, concerts, places of worship, restaurants, kag bars.
Ini nga mga estratehiya ang ginhimo ilabi na para sa mga kabataan nga amo ang posible nagapangalag-ag pa sa pag-avail sang dose sang COVID-19 vaccine bangud sa pagpati nga indi man sila prone sa delikado nga coronavirus complications.
Suno kay Bombo International Correspondent Archie Enriquez direkta sa Israel, masobra na sa katunga sang populasyon sang bug-os nga Israel ang nakabaton sang ila doses.
Sa pagkamatuod, subong man nga semana, 500 ka mga tawo nga may complete vaccination ang napahanugutan na nga makadugok sa football stadium sa Tel Aviv agud makasaksi sa first of four concerts nga gin-organisa sang gobyerno.
Matandaan nga nag-umpisa ang vaccination campaign sa amo nga pungsod sang nagligad nga Disyembre 20, 2020 gamit ang BioNTech-Pfizer mRNA vaccine.
Sa subong, ang mga estratehiya sang Israel ilabi na ang green pass scheme amo ang ginakabig ‘closely-watched’ bilang ehemplo sa iban nga mga pungsod agud mabuksan man ukon mapabangon ang ila tagsa ka ekonomiya.
