Bisan pa nga nangin madinalag-on ang pagpatuman sang hagna nga Republic Act No. 12309 ukon Free Funeral Services Act, may mga pagpangduha-duha ang pila ka administrador sang mga semi-private nga sementeryo sa Iloilo parte sa posibilidad nga malibre ang pagpalubong sa ila lugar.
Sa interview sang Bombo Radyo kay Alejandro Ordaniel, Caretaker sang Jaro Catholic Cemetery, ginpahayag niya nga kada tuig may bayad nga ₱200 para sa arkila sang pantyon bilang maintenance.
Dugang pa niya, ang bayad para sa kalkal kag pagsira sang lulubngan nagalab-ut sa ₱1,500.
Kung magpalubong ka sa pantyon nga wala sang amoroso, kinahanglan bayaran sang ₱3,500.
Suno kay Ordaniel, pabor man sila sa hagna nga nagahatag sang libre nga serbisyo sa mga imol, apang ginpunto niya nga indi dapat malibre ang pagpalubong sa mga pantyon nga wala gina-arkilahan.
Ginpabutyag niya nga wala sang labot ang gobyerno sa ila sementeryo bangud semi-private ini kag kun librehon ang serbisyo, posible nga indi na mapuslan ang lugar bangud wala na sang tawo nga magapaninlo kag magabantay.
Matandaan nga ang Republic Act No. 12309 epektibo sang Setyembre 28, 2025.
Ginapahanumdom nga ang mga pamilya nga ginakabig nga indigent suno sa National Economic and Development Authority kag Department of Social Welfare and Development ang maka-avail sang libre nga kabaong nga disente kag barato, kag serbisyo sa pagpalubong para sa mga pamilya nga yara sa krisis.
Ang DSWD ang mangin panguna nga ahensya sa pagpatuman sang hagna.
Katuyuan sang hagna amo ang pagbulig sa mga pamilya nga wala sang kapasidad magbayad sang pagpalubong kag pagsiguro nga may dignidad ang kada Pilipino tubtob sa iya katapusan.
