Nagsugod na ang bag-o nga gobyerno sang Indonesia sang mala-ambisyoso nga proyekto sa pagpakig-away sa malnutrisyon paagi sa pagpakaon sa halos 90 milyon ka kabataan kag nagabusong.
Suno kay Ginavella Cumla, Bombo International Correspondent sa Indonesia, iya ginpahayag nga ang proyekto ang gingastohan sang $28 billion ukon malapit P2 trillion.
Ginpahayag man ni Cumla nga ang pondo ang ginbato sang mga palamangkutanon sang mga kritiko kon bala ang programa masarangan sang gobyerno.
Ang programa nga Free Nutritious Meal isa sa mga kampanya sang bag-o nga president sang Indonesia nga si President Prabowo Subianto.
Suno sa iya, ang programa nagatuyo sa pagpakig-away sa stunting growth sang kabataan nga nagaapekto sa 21.5% sang mga kabataan sa Indonesia nga wala pa 5 ka tuig kag makapataas sang kita sang mga mangunguma.
Nagpasalig si Subianto nga padasigon ang GDP growth sa 8% halin sa 5% subong.
Sa inauguration speech sang Oktubre, ginpahayag ni Subianto nga madamo sang mga kabataan ang malnourished rason nga magahatag ang gobyerno sang libre nga paniyaga sa eskwelahan kag gatas sa 83 million ka mga estudyante sa masobra 400,000 ka mga eskwelahan sa Indonesia.
