ILOILO CITY -Ipadayon sang Iloilo City Government ang programa nga Free Movie para sa mga Senior Citizen.
Sa interview sang Bombo Radyo kay Iloilo City Councilor Alan Zaldivar, co-chairman sang Committee on Senior Citizens, iya ginpahayag nga mahimo na nga makakuha sang booklet ang mga senior citizen sa Senior Citizen’s Office sa Iloilo City Hall.
Suno kay Zaldivar, sa pagkuha sang booklet, ang Senior Citizen Identification Card lamang ang dapat nga dal-on.
Ginpahayag ni Zaldivar nga regular showing sa mga senihan sang SM, Robinson kag Festive Mall sa tagsa ka Martes nga adlaw ang mahimo nga malantaw sang libre sang mga senior citizen.
Samtang, bilang chairman sang Committee on Health, ginpahayag ni Zaldivar nga tatlo ka mga ordinansa ang iya nga napasar nga ginalakipan sang Institutionalization of Public Employment Service Office, pagtukod sang Cooperative Development Office kag pagdihon sang Revised Comprehensive Code of Iloilo City.
May kaangtanan naman sa mga ordinansa nga luyag niya tutukan, ginpahayag ni Zaldivar nga dapat nga pasangkaron ang Immunization program agud nga matapna ang nanari-sari nga balati-an, pagdihon sang ordinansa may kaangtanan sa sanitation ilabi na sa mga ambulant vendor nga nagabaligya sang pagkaon, hospital waste management disposal kag ang pagpadayon sang kampanya sa pagpaninlo sa palibot agud nga matapna ang Dengue Hemorraghic Fever.
