Ginpamatud-an sang isa ka anay overweight ukon obese sa malawig nga tinion nga ”it’s all in the mind” ukon yara lang sa huna-huna sang isa ka indibidwal ang konsepto nga may imposible sa kalibutan.
Sa interview sang Bombo Radyo sa beauty pageant kag zumba enthusiast nga si Rio Camangonan, nagatrabaho bilang technical coach sa isa ka Business Process Outsourcing (BPO) company, iya ginpahayag nga kun makapatay lang ang masakit nga mga tinaga nga ginhaboy sa iya sadto sang nagadangat sa 110 kilogram ang iya kabug-aton, makabig na siya nga ”double dead.”
Apang wala niya ini ginpasugtan nga makapatay sa iya kag sa baylo, gingamit niya ini nga motibasyon kag rason agud mabuhi ang iya paghimakas nga lainon ang routine sa pagkaon.
Gintinguhaan ni Camangonan nga islan ang iya ”mindset” sa iya pagkaon indi lamang bangud sa mga tawo nga nagasuya sa iya panglawason kundi para mismo sa iya kaugalingon kag ikaayong lawas.
Ginkabig niya nga isa ka relasyon ang iya pag-diet sa diin indi siya pwede nga mag-cheat ukon magpadala sa temptasyon.
Ginbayaan man niya ang mga pagkaon nga puno sang carbohydrates kaangay sang kan-on, softdrinks kag junk foods.
Apisar dako ini nga pagpanghangkat suno sa natungdan, napamatud-an niya sa malip-ot nga tinion nga wala lang nabuhinan ang iya kabug-aton kundi nadugangan man ang iya pagka-mapinasalamaton kag kalipay sa kabuhi.
Dugang pa niya, kun ano nga mga butang ang ginapasulod sa huna-huna, amo man ang ginabun-ag sini rason nga tuman ka importante ang pagpili sang positibo nga panan-awan.
