Ipatuman ang mas mahal nga balayran para sa maga-book sang flights sa Agusto.
Sa abiso sang Civil Aeronautics Board (CAB), ginhatagan sang awtoridad ang carriers nga pasakaan ang fuel surcharge sa Level 4 sa masunod nga bulan halin sa record-low Level 3 subong nga Hulyo.
Sa Level 4, mahimo makapanukot ang airlines sang fuel surcharge nga P117 tubtub sa P342 para sa domestic flights kag P385.7 tubtub sa P2,867.82 para sa foreign departures depende sa distansya.
Ini nga saka sa fuel surcharge ang ginpatuman sa tunga sang manubo nga demand sa airlines bangud sa pag-ulan-ulan diri sa pungsod.
Kun lantawon naman sa global level, may pagsaka sa jet fuel bangud sa madamo nga factors suno sa oil producers lakip na ang nangin mataas nga tensyon sa Middle East nga nag-resulta sa mataas nga taripa sa US.
Nahibaluan nga ginapasugtan sang CAB nga ipasa sang airlines ang fuel surcharge sa mga pasahero agud nga makabangon man sila sa costs halin sa fluctuations sa global market.
