Wala sang mangin pagbag-o sa bayaran sa fuel surcharge sa masunod nga bulan matapos gin-anunsyo sang Civil Aeronautics Board (CAB) nga magapabilin ini sa Level 4.
Ini na ang pang-lima nga sunod-sunod nga bulan nga wala sang fuel surcharge adjustment halin sang ginpasaka ini sa Level 5 sang Septyembre 2024.
Sa idalom sang Level 4, magabayad ang pasahero sang dugang nga P117 tubtub sa P342 para sa domestic flights kag P385.70 tubtub sa P2,867.82 para naman sa mga flight sa luwas sang pungsod.
Ang fuel surcharge amo ang dugang nga fees nga ginasukot sang airlines agud nga makabawi man sila sa fuel costs. Separado ini sa base fare nga amo naman ang actual amount nga ginabayaran sang pasahero para makapuwesto sa sulod sang eroplano.
Sa idalom sang Level 4, ang mga pasahero pakadto sa Caticlan, Legaspi, Kalibo kag Roxas ang ginasukot sang dugang nga P184 samtang ang magabyahe naman pakadto sa Laoag, Iloilo, Bacolod, Cebu kag Puerto Princesa ang magabayad sang P232 sa fuel surcharge.
Photo: Russel Palma
