Nagalaom ang barangay officials sang Rizal Pala Pala II, Iloilo City Proper nga magtaas ang vaccination rate sa ila lugar kasunod sang patigayunon nga barangay-based vaccination sang Iloilo City COVID-19 team sa masunod nga semana.
Sa interview sang Bombo Radyo kay Punong Barangay Noel Soliman, iya ginpahayag nga posible nga madamo na sang ma-engganyo sa iya pumuluyo nga magpabakuna bangud ang vaccination team na mismo ang magapadulong sa mga barangay sa kada distrito agud himuon ang inoculation.
Suno kay Soliman, halos 27 percent pa lang sang iya pumuluyo ang nabakunahan batok sa COVID-19 kag indi magnubo sa 130 pa lang ka indibidwal ang nagpalista para sa patigayunon nga barangay-based vaccination.
Ginatudlo sang opisyal ang nagalapta nga fake news sa social media bilang rason kun ngaa madamo sa gihapon ang mga nagapamalibad magpabakuna.
Nahibaluan nga 1,000 ang target vaccinees sa kada site kada adlaw, dapat nga naka-prepregister ang mga tawo, kag may isa ka daku nga gym sa kada distrito agud maka-cater sang clustered barangays.
