ILOILO CITY- Mahimo na nga magbyahe ang mga Filipino nga fully vaccinated batok sa COVID-19 sa Singapore nga indi na kinahanglan i-quarantine didto umpisa sa Marso 4.Ini ang pinaagi sa vaccinated travel lane (VTL) program sang Singapore.
Kinahanglan lang nga magkuha sang flight nga pang-VTL kag kumpletuhon ang requirements.
Suno kay Department of Tourism Secretary Bernadette Romulo Puyat, sa idalom man sang programa, mahimo man nga magbiyahe sa Pilipinas ang mga bakunado nga taga-Singapore nga indi na pag-quarantine.
Suno sa Department of Tourism, yara sa 21,974 ang tourist arrival sa mga airport sa pungsod sa una nga 10 ka adlaw nga nagbukas ang Pilipinas sa mga fully vaccinated nga dumuluong nga turista.
Sa amo nga numero,yara sa 11,900 ukon masobra sa katunga ang mga dumuluong nga turista samtang 10,074 ang balikbayan.
Nagalaum man ang ahensiya nga makabulig sa pagdugang sang turista ang pagbaton sang Pilipinas sa mga local COVID-19 vaccine certificate nga halin sa iban nga pungsod.
Nadugang sang damlag lang ang Egypt, Maldives, Palau, Albania, Estonia, Greece, Malta kag Uruguay sa mga pungsod nga may vaccination certificates nga ginkilala sang Pilipinas.
